La revisto di pialuts velaiencs en primièro lìnio

L'Ecò dei bousquetoun èro la revisto qu'avioun li pialuts d'Auvergno e de Prouvençouno revisto animado per Albert Boudon - Lashermes (1882 - 1967), pouèto en velaienc amm' en prouvençau "reservado i souldats en primièro ligno am' i nafras".

Avio quatre paginos qu'avet eici

                          L'ecò dei bousquetoun
                               edicioun velaienco
                     3o Annado - No 2 - 4 de Febrié 1917

   
             

                                 Fai fre

      Nostes abounas se devon demanda coume se fai que noste journalet ié vèn plus pourta de nouvellos dóus amis que soun subre lou front.

       Pamèns chaudriò pas pensa que l'Ecò siegue mort, crudelamen pica pèr quauquo marmitasso bòchi !...

       Nàni!... Es pas mort!... E se parèis emé quauque pau de retard, acò's la fauto de l'ivèr.

       Fai fre, subre lou front!... L'auro ié boufo, escoubant la plano deserto, e lou fiò-sacra qu'an encaro dins lou cor lei paures sóudards pòu pas gaire ié teni lei mos chaudos pèr escriéure lou journalet!

      Lou presidènt Wilson, qu'a tant de bonos intenciouns pèr faire lou bonur dei gènts, fariò bi de meiour trabai en mandant à nostes guerriés un pau de charboun de sei minos qu'en ié fasènt passa toujour de notos pèr ié counta de bounimens e ié faire à chasque cop vira la coucourello emé touta sa retourico !

      Adounc, enjusqu'eici, nostes imprimaires qu'avien lei dets gelas an pas agu lou  biàis de tira nosto fueio! Mai se soun di pamèns que chaliò pas leissa toumba l'Ecò pèr quauques malurous degras que vòu marca lou tremoumètre!    (sic)

     E sènso apeita pu long tèms, recoumènçon anuei la besougno.

    Fai fre!... O bi!... Mai an, maugrat tout, lou cor chaud !

                                                         L.R.

Moussu Poincaré, noste prouprietàri, nous vòu plus louja !!...

Nous a jita dins la charrèiro,
Lou Presidènt, aquéu mati !
Fasiò fre-n-à fèndre la pèiro...
Mai nous a bi chaugu parti!

E pamèns erian, cambarado,
Urous e gais en soun oustau,
Lou mai gentoun de l'enountrado,
Lou mai superbe, lou pu chaud!...

Ié mancavo bi quauquo plancho,
Quauquo téulo, sus lou cubert...
E de petas de nejo blancho
Ié prenien sei quartiés d'ivèr.

Chasque cop, sus moun lié de paios
Me revihave, bravounet,
Lei jambos freidos dins mei braios,
L'auriho amai, dins moun bounet !

Vivament passave ma pato
Dessubre moun mourre e moun nas
Coume fai, près dei fiò, 'no chato...
A!  i'en aviò de floucounas !...

Mai ère bèn urous encaro
De ié dourmi tranquilamen!...
E Moussu Poincaré, toutaro,
Que nous chasso dei loujamen !!!...

Ounte anaren, l'amo marrido,
Querre anuei un apartamen
E gagna nosto pauro vido
E nosto paio ounestamen ?...

Ounte nous en-anaren jaire ?...
Auren plus ne fiò ne cubert !
Restaren deforo, pecaire !
Au siblamen d'un vènt d'infèr...

Franchamen, cò's pas charitable,
Moun bon Moussu lou Presidènt
De manda de sóudards au diable
Pèr aquèu fre viéu e mourdènt !

Avèn garda vosto oustalasso
Que lous óubus an espeça
E que badavo dins la glaço
Emé soun casque defounça.

I'avèn, -car sian de brave mounde, -
Sougna lou moubilié tant bèn
Que pènse pas que se i'escounde                              
De póussièro, moun Presidènt !

E dins lei legiouns militàris
Crèse bi qu'aurés amoundaut
Jamai tant braves loucatàris
Pèr abita dins voste oustau !

                1 de febrié 1917
                G. de la Malouteyro