Acò ve del chant primier :
Poulit roussinhòu, quand lou jour se lèvo
E que l'angelus s'en vo di clouquiés,
Quand li fiòs-foulets, lou Drac e lo trèvo
Farandolou plus ol tour di pesquiés
Sus l'aure fouilhut que lou vent trantiolo
E semblo bressa coumo un efantou,
Quand tout es en flours, de to garganholo,
Li matis de mai gisclo uno cansou.
Enfi ès tournat, Ah! que l'oun se caro,
Après lo glacino e lou sourne ivèr,
Oussèl agradiéu, t'ougi ta voux claro
Faire un trioulet e lou traire en l'èr !
Alèro cò's tu lou rèi de lo fèsto,
Plus de turo-luro e plus de piéu-piéu;
Lou mèrle abaiont quitomen s'arrèsto
D'estufla sul terme ound' o fat soun niéu.
Poulit roussinhòu, tu qu'ès un troubaire
Que conto lo nuét, que conto lou jour,
Te couneisse plo, t'aime coumo un fraire,
Ousselou divenc, parlo-me d'amour.
Couneisse pas res de lo vido enquèro
Vau plus à l'escolo e soui pas sabent
Dimpièi que moun paire o quita lo terro
Guel qu'aimabe tont e ploure souvent :
Cado jour to lèu qu'ol found de lo prado
Per sega lou fé s'en vòu li bouiés
Mene moun troupèl amount sul l'aussado
Ol miet de lo brousso e di ginibriés.
Sul l'erbo estendut, ois labros l'espigo
Dins lou comp de blat culido en passent,
Raibe ati soulet e pense ò mo migo,
Amic te sario plo recouneissent ;
Tu que sabes tout, tu qu'ès un troubaire
Dount lou cont bressaire es to plo rimat,
Se uèi me disies de qué me càu faire
Per plaire toujour e per esse eimat ?
Aucun commentaire:
Enregistrer un commentaire