Lou porto-aigo Pouèmo de Pau Areno

Un porto - aigo es un aqueduc.
Gardoun es lou noum prouvençau de la ribèiro le Gard.

    LOU PORTO - AIGO


De cèu blu n’a plen si bàrri,
Dre dins lou gourg dóu Gardoun,  (Drèit dien...)
Lou porto-aigo soulitàri,
Lou vièi pont à l’abandoun.

Sus lou frountoun que degruno
Te menarai pèr la man ;
De soulèu emai de luno
Quant n’a vist lou pont rouman !

Sarro-te sus moun espalo ;
Es tant brave d’avé pòu !
Alin ris l’aigo verdalo
E canton li roussignòu.

Vai plan, moun bras t’encenturo ;
Fai me’n poutoun, res nous vèi.
Dins lou tremount, sus l’auturo,     (Dien lou galabru..)
Sian pichot e sian li rèi!

Souto lis arcado sauro
Boufo l’auro dóu valoun ;
Laisso-me, fòu coume l’auro
Esfaraja ti péu blound.

Long dóu camin de Sant Jaque
I’a’n vòu d’astre trefouli ;
Qu’uno estello se destaque,
Anarai te la culi.


                  Pau Areno